Bu günədək yalnız paytaxtda fəaliyyət göstərən ixtisaslaşmış tibb müəssisələrində icrası mümkün olan bir sıra cərrahi əməliyyatlar artıq TƏBİB-in tabeliyindəki region xəstəxanalarında da uğurla icra olunur.

Qax Rayon Mərkəzi Xəstəxanasının Cərrahiyyə blokunun təmiri, əməliyyatxananın yeni və tam müasir tibbi avadanlıqlarla təchiz edilməsi bir sıra əməliyyatların icrası üçün yeni imkanlar yaradıb. Artıq tibb müəssisəsində minimal invaziv üsulla əməliyyatların icrası da intensivləşib.

Məlumat üçün bildirək ki, Əməliyyat bloku minimal invaziv üsulla cərrahi əməliyyatların icrası üçün laparoskopik cihaz, müasir standartlara cavab verən çoxfunksiyalı əməliyyat masası, əməliyyat lampası, xəstə monitorları, cərrahiyyə alət dəstləri ilə tam təchiz edilib.

Bununla yanaşı, müəssisədə kadr potensialı da artırılıb və əməliyyatların həyata keçirilməsinə yeni həkim-cərrah və anestezioloq cəlb edilib.

Məlumat üçün bildirək ki, əvvəllər bu cür cərrahi əməliyyatlar üçün sakinlər ətraf rayonlardakı və ya paytaxt Bakıdakı ixtisaslaşmış tibb müəssisələrinə göndərişlə müraciət edirdi. Hazırda TƏBİB tərəfindən həyata keçirilən yeniliklər nəticəsində rayon sakinləri Qax Rayon Mərkəzi Xəstəxanasında sözügedən cərrahi əməliyyatlardan yararlana bilirlər.

Qeyd edək ki, cərrahi əməliyyatlar İcbari Tibbi Sığorta üzrə Dövlət Agentliyinin Xidmətlər Zərfi çərçivəsində həyata keçirilir.