Tibb müəssisələrində əhaliyə göstərilən xidmətlərin keyfiyyətinin artırılması məqsədilə yenidənqurma işlərinin həyata keçirilməsi, yeni şöbələrin yaradılması, köhnə və şəraitsiz şöbələrin yenidənqurulması, yararsız tibb avadanlıqların yeniləri ilə əvəz olunması və müasir standartlara uyğun tibbi cihazların quraşdırılması istiqamətində işlər davam etdirilir.

Son dövrlə bu istiqamətdə TƏBİB tərəfindən həyata keçirilən daha bir yenilik Kliniki Tibbi Mərkəzlə bağlıdır. Müasir tibbi texnologiyalarla təchiz olunan Mərkəzin Radiologiya şöbəsinin iş keyfiyyətinin artırılması məqsədi ilə növbəti zəruri yeniliklər edilib, tibb müəssisəsində ikinci MRT və KT cihazları istifadəyə verilib.

Mərkəzin Radiologiya şöbəsində maqnit-rezonans tomoqrafiya (MRT) və kompüter tomoqrafiyası (KT) aparatları yenilənib, daha geniş gözləmə zalı və onlayn növbəlilik sistemi yaradılıb. Beləliklə, son yenilliklərdən sonra Mərkəzdə daha geniş spektrli və kontrastlı müayinələrin aparılması mümkün olub.

Məlumat üçün bildirək ki, yeni KT cihazında bir neçə detektor mövcuddur. Bu, xəstələrin daha qısa müddət ərzində, daha az radiasiya ilə müayinəsini və yüksək rezolyusiyalı görüntülər əldə edilməsini təmin edir. MRT cihazında tətbiq olunan qabaqcıl texnologiyalar da xəstələrin qısa müddət ərzində rahat şəkildə müayinəsini və yüksək dəqiqliklə yüksək keyfiyyətli görüntülər əldə edilməsini təmin edir.

Yeni cihazların quraşdırılması Kliniki Tibbi Mərkəzdə həyata keçirilən radioloji müayinələrinin sayına və keyfiyyətin artırılmasına da təsir edəcək. Həmçinin qeyd edək ki, bununla da Mərkəzin artıq iki müxtəlif korpusunda MRT və KT xidmətləri fəaliyyət göstərəcək.

Xatırladaq ki, Mərkəzdə əvvəl pasiyentlər kontrastlı MRT və KT müayinələri üçün digər dövlət və özəl tibb müəssisələrinə yönləndirilirdi.