Tibb müəssisələrində göz xəstəliklərinin müayinə və müalicəsinin inkişaf etdirilməsi istiqamətində davamlı tədbirlər görülür.

Qobustan Rayon Mərkəzi Xəstəxanasında ilk dəfə gözdə, əsasən, şəkərli diabet xəstəliyi ilə əlaqəli yaranan problemlərin müalicəsində istifadə edilən Avastin inyeksiyası həyata keçirilib.

Avastin inyeksiyası, xüsusilə diabetik retinopatiya, yaşa bağlı makula degenerasiyası və retinal damar patalogiyalarının müalicəsində geniş tətbiq olunan effektiv terapiya üsuludur. Bu müalicə metodu torlu qişada patoloji damarların proliferasiyasını və ekstravazasiya nəticəsində yaranan ödemi azaldaraq, xəstələrin görmə funksiyasının qorunmasına və vizual reabilitasiyasına mühüm töhfə verir.

Qeyd edək ki, Qobustan Rayon Mərkəzi Xəstəxanasında göz xəstəliklərinin müayinə və müalicəsinin inkişaf etdirilməsi istiqamətində zəruri tədbirlər görülüb. Bura müasir oftalmoloji avadanlıqlarla təchiz edilib, oftalmoloji kabinet avtorefraktometr, optik linza dəsti, proyektor və biomikroskop kimi yüksək texnologiyalı tibbi avadanlıqlarla təmin olunub. 2022-ci ildən tibb müəssisəsində kiçik göz əməliyyatlarının, 2024-cü ildən isə katarakta əməliyyatlarının icrasına başlanılıb.

Onu da əlavə edək ki, Qobustan Rayon Mərkəzi Xəstəxanası da daxil olmaqla, TƏBİB tabeli bütün tibb müəssisələrində icbari tibbi sığortanın Xidmətlər Zərfinə daxil edilən göz xəstəliklərinin müayinə və müalicəsi ödənişsiz qarşılanır.