TƏBİB-in Təlim və tədqiqatlar departamentinin təşkilatçılığı ilə Yeni Klinikada "Kardioloji xəstəliklər zamanı təcili və təxirəsalınmaz tibbi yardım" adlı seminar keçirilib.

Açılış nitqi ilə çıxış edən Yeni Klinikanın direktoru Barat Yusubov seminarın mövzusunun aktual olduğunu diqqətə çatdırıb. O, məruzəçilərin peşəkarlığı sayəsində iştirakçıların geniş məlumatlar əldə edəcəklərinə inandığını qeyd edib. 

Daha sonra TƏBİB-in Tədqiqatlar və protokolların tətbiqi şöbəsinin müdiri Kəmalə Ağayeva çıxış edib. O, beynəlxalq tövsiyələrə əsasən hazırlanmış kardioloji təcili və təxirəsalınmaz hallar üzrə alqoritmlər əsasında baş tutacaq seminardan həkimlərin faydalana biləcəyini və əldə etdikləri biliklərdən praktikada yararlanacaqlarını bildirib.

Ümumilikdə 146 nəfər əməkdaşın, o cümlədən kardioloqların, təcili tibbi yardım həkimlərinin cəlb edildiyi seminarda məruzəçi qismində kardioloqlar Ruslan Bağıyev, Mehriban İsgəndərova, Mehri Həşimova və uşaq-kardioloqu Bəhruz Əliyev çıxış edib. Onlar hipertenziv krizin idarəolunması və müalicəsi, böyüklərdə və uşaqlarda taxikardiya, bradikardiya alqoritmləri kimi mövzularda ətraflı məlumatlar təqdim ediblər.

Seminarın sonunda iştirakçıların sualları məruzəçilər tərəfindən cavablandırılıb.