TƏBİB-də mövsümi qrip xəstəliyinə qarşı peyvəndlənmə təşkil olunub. Peyvəndlənmə prosesində qurumun rəhbər heyəti və əməkdaşları iştirak edib.
İlkin olaraq müvafiq müayinələrdən keçən və əks-göstəriş qeydə alınmayan əməkdaşlar peyvənd edilib.
Mövsümi qrip xəstəliyinə qarşı peyvənd olunma xəstəliklərdən qorunmaq və immun sistemi gücləndirmək üçün tövsiyə olunur. Peyvənd böyüklərə və 6 aydan yuxarı olan uşaqlara təyin etmək üçün nəzərdə tutulub.
Peyvəndin tərkibindəki təsiredici maddəyə və ya preparatın tərkibinə daxil olan köməkçi maddələrdən hər hansı birinə qarşı allergiya olması böyüklərdə və uşaqlarda istifadəyə əks-göstərişdir.
Qeyd edək ki, ölkəyə Səhiyyə Nazirliyi tərəfindən gətirilən qrip əleyhinə vaksinlər “Abbott” şirkətinin istehsalıdır. Bu peyvəndlər Ümumdünya Səhiyyə Təşkilatının və Avropa Şurasının tövsiyələrinə müvafiqdir.