TƏBİB ahıl və həssas qruplara daxil olan şəxslərin, uşaq, hamilə və zahı qadınların müşahidəsini aparmaq, tibbi xidmətlərə əlçatanlığı təmin etmək, o cümlədən icbari tibbi sığortanın yaratdığı imkanlar çərçivəsində təqdim olunan xidmətlərlə bağlı maarifləndirmə işinin gücləndirilməsinə dəstək məqsədilə tibbi müayinə tədbirlərini davam etdirir.

Ağsu Rayon Mərkəzi Xəstəxanasının təşəbbüsü ilə ucqar kənd yerlərində yaşayan sakinlər onlar üçün ayrılmış xüsusi mikroavtobuslarla tibb müəssisəsinə daşınaraq, tibbi müayinələrə cəlb olunublar.

Bu günədək mərhələli şəkildə rayonun 3 kəndindən - Rəhimli, Şahbəyli və Padardan ümumilikdə 40-dan çox sakin tibbi müayinələrdən keçib və kəndlərinə geri qaytarılıb.

Müayinələr zamanı müxtəlif ixtisaslı həkimlər tərəfindən sakinlərə ümumilikdə icbari tibbi sığorta çərçivəsində 200-dən çox tibbi xidmət göstərilib.

Eyni zamanda müayinələrə cəlb olunan sakinlərə ölkədə səhiyyənin inkişafı, bu sahədə həyata keçirilən yeniliklər və tibbi xidmətin əlçatanlığının təmin edilməsi istiqamətində görülən işlərlə bağlı məlumatlar verilib.