53 yaşlı qadın pasiyent Respublika Neyrocərrahiyyə Xəstəxanasına solda görmənin itməsi səbəbilə müraciət edib.
Ətraflı müayinələrdən sonra həkim-neyrocərrah Elşən Hüseynzadə tərəfindən pasiyentə sol yuxu arteriyasının nəhəng paraklinoid anevrizması diaqnozu qoyulub.
Çətin və riskli olan nəhəng anevrizmanın kliplənməsi əməliyyatı prosesində həkim-neyrocərrahlar Elşən Hüseynzadə, Ələsgər Həsrətov, Rasim Quliyev və gənc həkim-neyrocərrahlar Vüsal Məmmədov, Firuzə Yusifli iştirak ediblər.
Bu cərrahi əməliyyat Respublika Neyrocərrahiyyə Xəstəxanasında ilk dəfə icra olunub. Uğurla nəticələnən əməliyyatdan sonra pasiyentin görməsində əhəmiyyətli yaxşılaşma müşahidə olunub və zəruri tibbi xidmətlər göstərildikdən sonra ambulator müalicə üçün evə buraxılıb.